efeutu, l’: sust. Resultáu [al que se llega con daqué]. L’efeutu d’esi venenu ye la muerte. «Agasayadura» ye l’aición y l’efeutu de «agasayar». 2 Validez, capacidá [pa producir un resultáu]. Declaro esta llei aprobada, con efeutu dende’l so espublizamientu oficial. 3 Impresión, sensación [que se produz en daquién]. Esti asuntu causó-y mal efeutu. 4 Movimientu xiratoriu especial [que se-y da a una pelota, a una bola al llanzala]. Pa tirar el biche tienes que da-y efeutu a la bola. || A efeutos de, pa [daqué], con validez pa [daqué]. Estos años de cotización nun te van a valir a efeutos del retiru anticipáu. || A esi efeutu, en rellación colo que se ta falando. || Al efeutu, en rellación colo que se ta falando. || Efeutu invernaderu, Aumentu de la temperatura [de l'atmósfera pola mor de la capa de gases que producen les combustiones industriales y otres actividaes]. || Efeutos especiales, conxuntu de trucos y téuniques [usaes na representación d’una obra de teatru, d’una película p’asemeyar fechos fantásticos o qu’imiten la realidá]. || Golpe d’efeutu, aición o dichu [que produz l’almiración de los demás, que llama l’atención]. || N’efeutu, sí, ye cierto.