cuenta, la: sust. Aición y efeutu de contar númberos. 2 Operación aritmética. Nun soi a facer esta cuenta tan difícil. 3 Conxuntu de númberos [preparaos pa facer con ellos una operación aritmética]. Copiái esta cuenta pa mañana. 4 Llista [detallada de cantidaes d’un gastu, d’un ingresu y el resultáu d’operar aritméticamente con elles]. Yá me preparó la cuenta de los gastos del mes. 5 Cantidá [de dineru que se debe y que ye’l resultáu de sumar cantidaes más pequeñes]. Tengo que pagar la cuenta del restaurante. 6 Papel [onde s’especifiquen les cantidaes y el total d’un gastu fechu]. Perdí la cuenta del supermercáu. 7 Posibilidá de mercar [daqué] ensin pagalo nel momentu. Tengo cuenta na carnicería. 8 Asuntu [pendiente qu’hai qu’arreglar pa llegar a bon fin]. Contigo tengo yo munches cuentes qu’arreglar. 9 Responsabilidá. Eso déxalo que ye cuenta mía. 10 Pieza [de les que s’enfilen pa facer un collar, una pulsera]. 11 Total de dineru [que se tien nun depósitu bancariu]. Tien una cuenta de quince millones. 12 Contratu bancariu [que permite guardar una cantidá de dineru pola que se cobren unos intereses]. Anulé la cuenta’l bancu. || A cuenta, ensin pagar o cobrar nel momentu [una mercancía]. Entainó a salir de la zapatería y pidió que-y lo dexaren a cuenta. || A la cuenta (de), polos medios [de so]. Ella aprendió a la so cuenta. || Arreglar les cuentes, pegar, dar golpes. 2 Aclarar los problemes [d’un asuntu con daquién]. 3 Esixir un comportamientu afayadizu [a daquién]. || Axustar les cuentes, pegar, dar golpes. 2 Aclarar los problemes [d’un asuntu con daquién]. || Cayer na cuenta, acordase, ser consciente [de daqué]. || Comer la cuenta’l gatu, fam. *espresión que se diz cuando daquién s’equivoca al calcular la fecha del partu. || Con cuenta y razón, arrémente, con tola intención. || Con (la) cuenta (de), con intención [de daqué]. Salió con cuenta compralu. Fui al hospital con cuenta de vela y yá-y dieren l’alta. || Cuenta corriente, contratu [bancariu que permite manexar un depósitu de dineru faciendo pagos direutos con cheques]. || Cuentes del olleru, ilusiones que se fai daquién ensin fundamentu. || Dar cuenta de [daqué o de daquién], contar o esplicar [con detalle un fechu]. 2 Dar noticies [de daquién]. || Dar cuentes de [daqué], contar o esplicar [con detalle un fechu]. || Dase cuenta, ser consciente. || De cuenta [de daquién], a la responsabilidá [de daquién]. || Echar cuenta, valorar les ventayes y los inconvenientes. 2 Reflexonar, pensar [sobre un asuntu]. || Echar cuentes, valorar les ventayes y los inconvenientes. 2 Reflexonar, pensar [sobre un asuntu]. 3 Facer planes, proyeutos. || En cuenta, na memoria [tener, llevar]. || En cuenta (de), en sustitución [de daqué o daquién]. En cuenta tuya quedó de marchar. Que nun vaya’l tíu, que vaya él en cuenta. 2 Cola intención [de daqué]. Salió en cuenta de vete. || En cuentes (de), en sustitución [de daqué o daquién]. || En resumíes (les) cuentes, resumiendo. En resumíes cuentes, ¿gustóte la novela? || Facer cuenta, valorar les ventayes y los inconvenientes. 2 Reflexonar, pensar [sobre un asuntu]. || Fuera (de) cuenta, cumplíu, pasáu’l día previstu pal partu. || Fuera (de) cuentes, cumplíu, pasáu’l día previstu pal partu. || Haber cuenta (de), haber noticies de. || La cuenta, la cantidá que se considera xusta, necesaria. Nun m’eches más chorizos que yá son la cuenta. 2 Nel puntu que se considera bonu. Les fabes taben la cuenta, nun taben nin soses nin salaes. 3 Perbién, a la midida. Esa camisa quédate la cuenta. 4 Bien merecío. Eso que te pasó túvote la cuenta. 5 Lo apropiao, lo xusto. Lo que te pasó foi la cuenta pa qu’espabilares. || La cuenta la vieya, conxuntu d’operaciones aritmétiques mui cencielles o que se faen colos deos. 2 Ilusiones [que se fai daquién ensin fundamentu]. || Llevar en cuenta, fixar [na memoria daqué que dixo, daqué que fixo daquién]. || Llevar (la) cuenta (de), fixar [con detalle na memoria, nun papel unos datos, unos gastos]. || Nun pasar per cuenta [a daquién], nun llevar la conciencia [daqué a daquién]. || Pasar de cuentes, cumplir, pasar del día previstu pal partu. || Pasase de cuentes, cumplir, pasar del día previstu pal partu. || Perder la cuenta, cumplir, pasar del día previstu pal partu. || Perder la cuenta de, nun ser quien a fixar na memoria [unos datos, unos detalles por pasar munchu tiempu, por ser muncha cantidá]. || Pola cuenta que tien [a daquién], polo que-y convién o que-y interesa [a daquién]. Comiólo pola cuenta que-y tenía. || Pola cuenta que trai [a daquién], polo que-y convién o que-y interesa [a daquién]. || Por cuenta [de daqué o de daquién], polos medios [de so]. 2 Por culpa [de daqué]. Por cuenta d’uno, por cuenta d’otro, nunca faigo nada. || Salir de cuentes, cumplir, pasar del día previstu pal partu. || Tar na cuenta, tener la intención [de facer daqué]. Toi na cuenta de dir a Galicia esti fin de selmana. 2 Creyer, dar por ciertu [un fechu ensin comprobalu]. Taba na cuenta de que yereis hermanes. Taba na cuenta de que marchabeis güei. 3 Ser consciente [de daqué]. || Tener cuenta, merecer la pena [daqué]. 2 Creyer, dar por ciertu [un fechu ensin comprobalu]. || Tener cuenta con [daqué], atender pa [daqué]. || Tener en cuenta [daqué o a daquién], pensar en [daqué o daquién al facer un plan, al tratar un asuntu]. Na reestructuración de la empresa nun me van tener en cuenta. || Tener mala cuenta [daqué], ser muncho, ser por demás. Lo que yo anduvi anueche mala cuenta tien. || Trayer cuenta, merecer la pena [daqué].