coyer: v. Quitar [el frutu d’un árbol, d’una planta, el miel d’un caxellu axuntándolo pa dempués aprovechalo]. 2 Detener [un animal pa zarralu, a una persona pa metela presa]. 3 Suxetar [daqué o a daquién cola mano, con un utensiliu]. 4 Facese con [daqué espurriendo’l brazu, cola ayuda d’otru oxetu]. 5 Consiguir, facese con [daqué]. Coyó un bon puestu na alministración. 6 Axuntar [daqué que taba espardío cola ayuda d’un oxetu]. Cueyi los cristales cola escoba. 7 Apoderase de [daqué ensin permisu]. 8 Quedar suxetu [un deu, un pie con daqué que manca]. Coyí’l deu cola puerta. 9 Entrar, poder metese [una cantidá de daqué nun cacíu, un grupu de xente nun vehículu]. Nesta pota cueyen tres llitros. 10 Tener espaciu abondu [pa pasar per un sitiu, p’allugase nun espaciu, pa poner daqué nun llugar]. La mesa nun cueye pela puerta. 11 Ocupar, enllenar [un espaciu]. L’armariu cueye media parede. 12 Atayar, llegar al mesmu puntu que [otru]. Coyílu na puerta yá. 13 Sorprender [a ún faciendo dalgo inconveniente, que nun quería que se supiere]. 14 Pillar [a ún despreveníu una noticia, l’agua]. 15 Entamar a tener [color, fuercia, una enfermedá]. Coyó’l gripe. 16 Afeutar, producir efeutu [una enfermedá, una calamidá, el sol]. El gripe coyólu bien esti añu. 17 Atrocar [un tiempu pa facer daqué]. Coyó estos díes p’acabar el trabayu. 18 Atrocar [vez pal médicu, nuna tienda]. 19 Montar [nun tren, nun autobús]. 20 Parar pa xubir [a daquién un coche, un autobús]. L’autobús cueye a la mayoría de los viaxeros nesta parada. 21 Usar [un coche, un ascensor, una máquina]. 22 Atropellar [un coche, un camión]. 23 Escoyer [d’ente dellos oxetos, d’ente delles posibilidaes]. 24 Tener [un sentimientu d’afeutu, una sensación de repunu]. Coyó ascu. 25 Entender [una idea, un conceutu]. 26 Facer propies [maneres, costumes ayenes]. 27 Dir [per un camín, per una direición]. 28 Contratar [a daquién pa un trabayu]. 29 Trabayar nes actividaes rellacionaes con [un oxetu, con un aperiu]. Anque ta retiráu entá cueye la fesoria. 30 Entamar [con estáu d’ánimu determináu, una actividá, un llabor]. Coyó’l trabayu con muncha gana. 31 Alcontrar a [daqué o daquién nun estáu determináu]. Coyí al profesor de mal humor. 32 Entamar a facer [daqué]. Coyó’l cursu a la metá. 33 Recibir [la llonxitú d’onda] de [una emisión d’un programa, d’una cadena, al aparatu receutor]. En Conforcos nun cueyen les cadenes privaes. Nun cueyo en casa esi programa de radio. 34 Coincidir [un fechu, un llugar, una aición nun puntu del camín que s’anda]. L’hospital cuéyeme de camín. 35 Tar asitiáu en [el camín]. La panadería cueye de camín pa casa a Sabel. 36 Acoyer, recibir [voluntariamente daqué o a daquién]. 37 Dirixise a [un sitiu]. 38 Cubrir [el machu a la fema]. 39 Metese l’agua en calzáu. || Coyela, tener [una borrachera]. || Coyer el corazón nun puñu, fam. producir angustia, congoxa. || Coyer el gustu a [daqué o a daquién], avezase [a facer daqué que presta, a tar con daquién que gusta]. || Coyer el ministru, mamar. || Coyer el montante, fam. colar, marchar [d’un sitiu]. || Coyer el pendín, fam. marchar, colar [d’un sitiu]. || Coyer fríu, tar nun ambiente que tien una temperatura baxo y ponese malu. || Coyer una falca, escuadrar un tueru [col hachu pa metelu na sierra y preparalu pa facelu tabla]. || Coyer y, *espresión cola que se refuerza lo que se diz darréu. Asina que coyó y marchó. || La de coyer, xaréu, escándalu grande. 2 Amarraza, griesca grande. 3 Cosa estraordinaria. || Mala torca cueya, *espresión cola que se maldiz a daquién, cola que se desea un mal a daquién. || Nun haber per onde coyer daqué o a daquién, *espresión cola que se da a entender que daqué o daquién nun tien nada bono. || Nun tener per onde coyer daqué o a daquién, *espresión cola que se da a entender que daqué o daquién nun tien nada bono. || Tener coyida la candela, entender mal les coses.