contar: v. Dicir [n’orde los númberos cardinales]. 2 Facer operaciones [siguiendo les regles aritmétiques pa llegar a saber una cantidá]. Cuenta lo que gastemos na plaza. 3 Dar un númberu consecutivu a [cada elementu d’un conxuntu, pa llegar a saber una cantidá total]. Has contar toles persones que tán en cine. 4 Concretar [el númberu total que faen los miembros d’un conxuntu, d’una cantidá]. Contaron los coches y yeren siete. 5 Meter dientro de [el númberu total que faen los miembros d’un conxuntu, d’una cantidá]. Nel preciu nun contasti’l postre. 6 Valir, tener valor [daqué]. Les aiciones son les que cuenten. La fuercia d’esti home cuenta por dos. 7 Ser consideráu válidu [pa daqué]. El to hermanu cuenta pa pagar. 8 Esponer [un socesu, un conxuntu de fechos colos sos detalles ordenaos]. 9 Enfotase en [daqué o daquién]. Cuento contigo pa que me lleves al puertu. 10 Disponer de [daqué o daquién]. Cuento con diez obreros pa llevantar la casa. 11 Suponer, tener la idea de [que va pasar daqué]. Cuenta casase pa marzu. 12 Falar [con afición y ensin procuru d’asuntos ayenos]. || Contar la mano, contar daqué que tenía que callase. || Contase colos deos de la mano, ser pocos, escasos en númberu.