comer: v. Tragar [alimentos pela boca]. Comió’l platu de sopa enteru. 2 Mazcar y tragar [alimentos sólidos pela boca]. Comió la mazana. 3 Xintar, tomar [alimentu a meudía]. Nesta casa cómese a les dos. 4 Dar una sensación [en pelleyu, nuna parte del cuerpu] que produz gana d’arrascase. 5 Consumir [una sustancia, una cosa a poco y a poco]. El sol come los colores. La llima come’l fierro. Güei comióse la xelada. 6 Nun pronunciar o nun escribir [una sílaba, una lletra, una pallabra entera]. Esta neña siempre come les eses. 7 Causar dañu, munchu sufrimientu [a daquién la molición, los celos, una enfermedá]. Cómelu la envidia. 8 Morder [les uñes, la ropa, el pelo]. 9 Ocupar [munchu espaciu, munchu terrenu]. La mesa come mediu cuartu. 10 Avasallar, humildar [a daquién] ensin nengún miramientu. Cuasi comen a los músicos, de lo mal que tocaron. Na escuela déxase comer por toos. 11 Eliminar de [un xuegu una pieza, una ficha o a un xugador]. Si te como pierdes la partida. 12 Dexar agotáu, ensin fuercies. Nesta casa coméisme ente toos. 13 Consumir, gastar [daqué]. Comiéron-y tol dineru al padre. 14 fam. Estorbar, causar dificultaes [una cosa nun sitiu]. ¿Qué te come esa mesa ehí? || Axuntase la fame cola gana de comer, fam. axuntase dos persones con zunes, con vezos mui asemeyaos. 2 Coincidir delles circunstancies mui asemeyaes. || Comer aparte, fam. ser especial. Xugando al fútbol, esa rapaza come aparte. || Comer cola vista, desear muncho [una cosa, a una persona]. 2 Mirar muncho [daqué o a daquién]. || Comer colos güeyos, desear muncho [una cosa, a una persona]. 2 Mirar muncho [daqué o a daquién]. || Comer del pote grande, fam. tener bona salú. || Comer el fégadu, fam. *espresión que s’usa p’amenazar a daquién. 2 Arruinar, dexar ensin nada. || Comer el garitu, merendar. || Comer el lleldu, fam. gastar munchu dineru. || Comer el pelleyu [daqué a daquién], esmolecer muncho [daqué a daquién]. || Comer la cuenta’l gatu, fam. *espresión que se diz cuando daquién s’equivoca al calcular la fecha del partu. || Comer la figura a daquién, *espresión que s’usa p’amenazar a daquién. 2 Arruinar, dexar ensin nada. || Comer la guaxa a ún, *espresión que se diz cuando daquién desmeyora, pierde la salú ensin sabese la razón. || Comer la inclusa, fam. facer munchu gastu. Esti neñu cómenos la inclusa. || Comer la llingua’l gatu a daquién, fam. *espresión que se diz cuando daquién calla, cuando nun fala. || Comer la midida’l gatu, fam. salir escasa una cosa por midir mal. || Comer la seta, aprovechar muncho [daqué]. || Comer la sopa boba, fam. vivir, comer a cuenta d’otru. || Comer la tarabiella a [ún], facer un mal desconocíu que [daquién] desmeyore físicamente. || Comer la tarabiella [daqué] o a [daquién], acabar con [daqué] o con [daquién] un mal desconocíu. || Comer l’alma, *espresión que s’usa p’amenazar a daquién. || Comer l’asadura, fam. *espresión que s’usa p’amenazar a daquién. 2 Arruinar, dexar ensin nada. || Comer les asadures, fam. *espresión que s’usa p’amenazar a daquién. 2 Arruinar, dexar ensin nada. || Comer les careses [a ún], poner [a daquién] nerviosu, impaciente. || Comer les coraes, fam. *espresión que s’usa p’amenazar a daquién. 2 Arruinar, dexar ensin nada. || Comer les formigues al Sol, nun dexar les nubes salir el Sol. || Comer les sopes [a ún], fam. crecer más que [ún]. 2 Apoderase de lo que correspondía [a otru]. || Comer los englayos, comer daqué que nun se sabe lo que ye. 2 Esplotar muncho [a una persona]. || Comer los engraños, comer daqué que nun se sabe lo que ye. 2 Esplotar muncho [a una persona]. || Comer los fégados, fam. *espresión que s’usa p’amenazar a daquién. 2 Arruinar, dexar ensin nada. || Comer los santos, fam. ser mui beatu, mui relixosu. || Comer los sesos [a daquién], fam. aburrir [a daquién con un asuntu obsesivu]. || Comer nuños (y xaracos), fam. nun comer nada. || Comer vivu [a daquién], causar munchu dañu [a daquién]. Los pioyos comiéronlu vivu. 2 Avasallar, humildar [a daquién] ensin nengún miramientu. Si lo digo cómenme vivu. || Comer xaraces, fam. *espresión que se diz a daquién cuando ye mui repunante pa comer, cuando nun tien qué comer. ¡Comíes bien xaraces! || Comer xaracos, fam. nun comer nada. || Comese los sesos, fam. pensar permuncho, facer munchu esfuerciu mental [pa iguar un problema, pa entender daqué]. || Echar de comer aparte, fam. tratar o considerar d’una manera especial. A esi hai qu’echa-y de comer aparte. || Ensin comelo nin bebelo, ensin motivu. 2 Ensin esperalo. || Nun saber ónde se come, nun conocer la realidá de la vida. 2 Tar desorientáu dafechu. || Xugar coles coses de comer, tratar imprudentemente con coses delicaes, que necesiten procuru.