cayer: v. Movese [dende un sitiu a otru más baxu lleváu pol propiu pesu]. Esti gatu cayó d’un quintu pisu y equí ta tan guapu. 2 Dexar de tar en posición vertical [una persona, un oxetu dempués de perder l’equilibriu]. Diéron-y un emburrión y cayó. 3 Dar [contra daqué al perder l’equilibriu]. Cayí de llombu contra la mesa. 4 Dir p’abaxo [daqué al salir d’un recipiente]. Van cayéndo-y les pataques del cestu. 5 Esbarrumbase, destruyise [una construcción, un edificiu por aición d’un pesu, de vieyu]. Si pases col camión cai la ponte. 6 Soltase [daqué d’onde taba suxeto, afitao]. Ta cayéndo-y el diente. 7 Colgar [daqué llibremente]. Nun me gusta que te caiga’l pelo pela cara. 8 Quedar más baxu’l borde de [un vistíu], de [una camisa per un llau que per otru]. Mira cómo-y cai la saya per detrás. 9 Tar, alcontrase [daqué nun sitiu]. Albandi cai nel conceyu de Carreño. 10 Coincidir [una fiesta, una fecha nun día de la selmana, nun mes]. Esti añu la fiesta cai de llunes. Paezme que l’antroxu cai en marzu. 11 Causar [bona o mala impresión una persona, pola so manera de ser]. Cai mal de lo atuñáu que ye. 12 Ser consciente de [daqué]. Nun caigo en quién ye’l que me dices. 13 Ser descubierta o agarrada [la persona que cometió una falta, un delitu]. Yá cayó’l lladrón. 14 Ser coyíu, pilláu con [engaños, trampes]. Cai muncha xente nesa mesma estafa. 15 Dir a menos en [salú, intensidá, preciu]. A la chaqueta cayó-y el color. 16 Facer [beneficiu o dañu daqué al organismu]. Nun sé cómo te pue cayer bien una fabadona a les diez de la nueche. 17 Quedar [bien o mal la ropa, un peñáu]. ¿Cómo me cai esti abrigu? 18 Asoceder [a daquién un mal, un dañu]. Cáyen-y a elli toles calamidaes. 19 Ponese [malu, enfermu]. Cayó malu dempués de venir del viaxe. 20 Dir a parar, acabar [nun sitiu, nuna situación]. ¿Ónde cayería Ramón que nunca lu volvimos a ver? Como sigan asina, van cayer na miseria. 21 Entamar a tener el vezu de [daqué]. De mozu cayó na bebida. 22 Perder el puestu [una autoridá, una persona con cargu importante]. Rúxese que van cayer dos conseyeres. 23 Dexar de tar vixente [una forma de gobiernu, un sistema políticu]. Dempués de tantos años cayó la dictadura. 24 Quedar elimináu [nuna competición, nun esame]. Entrenó muncho, pero cayó na primera eliminatoria. 25 Ser conquistáu [un país, una ciudá nuna guerra]. La guerra acabó cuando cayó la capital. 26 Tocar [daqué nun repartu, nun sortéu]. Cayeron venti millones en Cuideiru. 27 Ser dau [a daquién un golpe]. Cayéron-y bones morraes de pequeñu. 28 Morrer. Muncha xente cayó equí cuando la guerra. || A la que cai, mui atentu a tolo que pasa [pa sacar provechu]. || Cayer al casu, asoceder, pasar. || Cayer al pelo [daqué a daquién], fam. pasar [daqué a daquién por tenelo merecío]. || Cayer baxo, perder la dignidá [por facer dalguna cosa vergonzosa]. 2 Facer dalguna cosa vergonzosa. || Cayer bien [daqué a daquién], pasar [daqué a daquién por tenelo merecío]. || Cayer con tol equipu, fam. perder, ser derrotáu dafechu. || Cayer de culu, plasmar [con daqué que nun s’espera]. Cayó de culu cuando-y lo dixeron. || Cayer de la burra, dase cuenta, convencese. || Cayer de les nubes, asoceder [daqué ensin esperalo]. 2 Ser consiguío [daqué] ensin esfuerciu, ensin trabayu, gratis. 3 Dase cuenta, convencese. 4 Dexar de tar distrayíu. || Cayer de pie, tener siempre muncha suerte. 2 Quedar en bona situación [dempués de pasar per una situación mala]. || Cayer de pies, tener siempre muncha suerte. 2 Quedar en bona situación [dempués de pasar per una situación mala]. || Cayer del cielu, ser consiguío [daqué] ensin esfuerciu, ensin trabayu, gratis. Nesa casa cayíen les perres del cielu. Cayóte esi aprobáu del cielu. || Cayer del nieru, fam. dase cuenta, convencese. || Cayer d’esquina, fam. apregonase. || Cayer el chombu enriba la llexa, *espresión que se diz cuando escapen los pexes pela parte d’abaxo de la rede. || Cayer el pelo [a daquién], fam. pasar [a ún] dalgo grave [por facer daqué, por dicir daqué que nun convenía]. || Cayer el revólver al ríu, *espresión que se diz cuando daquién tien mala suerte, pierde daqué importante. || Cayer en sucu baxeru, arruinase, dir a menos económicamente. 2 Fracasar [un proyeutu, un plan]. || Cayer la baba (a filu), *espresión que s’usa p’amosar l’atontamientu que-y produz a una persona l’arguyu, el contentu que tien por daqué o daquién. 2 *Espresión que se diz cuando daquién ye bobu. || Cayer la cara de vergüenza [a daquién], entrar una vergüenza pergrande [a daquién]. || Cayer la cruz del perru, fam. venir munches necesidaes. || Cayer la gorda [a daquién], fam. venir una desgracia, una calamidá. || Cayer la lleva, venir mala suerte. || Cayer la manta [a daquién], fam. costar trabayu [a daquién] espertar. || Cayer l’alma (a los pies), entrar desilusión. || Cayer les arques [a ún], abrise les costielles [a daquién]. || Cayer na boca, asoceder lo contrario de lo que se dicía con enchipamientu, con arguyu. || Cayer na cuenta, acordase, ser consciente [de daqué]. || Cayer na nasa, fam. cayer nuna trampa. || Cayer padre a daquién, *espresión cola que se da a entender que daqué pue trayer males consecuencies a daquién. || Cayer redondu, dexar de tar en posición vertical [de sutrucu una persona, un animal]. 2 Perder el conocimientu [per un momentu]. 3 Dormise [ensiguida]. 4 Morrer [de secute]. || Cayer valtáu, dexar de tar en posición vertical [de sutrucu una persona, un animal]. || Cayíu en razón, sensatu, con xixa. || D’arques cayíes, malu y desganáu. || De brazos cayíos, ensin facer nada, ensin trabayar. || Dexar cayer, dicir [una cosa] ensin espresala dafechu, dándola sólo a entender. 2 Permitir [a daquién] que vaya a un sitiu onde hai xente. || Dexase cayer, dir a [un sitiu onde hai xente]. || Nun cayer embaxo [daqué a daquién], nun se-y escaecer [a daquién una cosa que se diz o que se fai] por da-y qué pensar. || Nun tener ónde cayer muertu, fam. ser perprobe. || Poner a cayer d’un burru [a daquién], reñer muncho [a daquién]. 2 Criticar muncho, falar con maldá de los defeutos o de les faltes de [daquién]. || Tar al cayer, tar p’asoceder [daqué]. 2 Tar al llegar [daquién]. || Tar cayíu en too, preocupase de too.