cambiar: v. Dar [una cosa por otra]. Cambiáronme un llibru por un reló. 2 Dar el valor de [una cantidá de dineru en dineru equivalente más menudo o en dineru d’otru país]. Cambié mil pesetes n’escudos. 3 Descambiar, devolver [al vendedor daqué que se compró, recibiendo otra cosa o’l dineru pagao]. Fui cambiar los zapatos porque yeren grandes. 4 Agarrar o facer agarrar les carauterístiques [d’una direición, d’una cualidá, d’un estáu nuevu]. Cola lluz cambia de color. La xente colos años cambia y faise más aposentao. Al llegar el branu cambia’l tiempu siempre. A ver si esta nueche cambia l’aire. 5 Quitar [a una persona, una cosa del so puestu pa poner a otra persona, otra cosa]. Cambiaron cuatro bombilles que taben fundíes. 6 Dexar de facer usu [de daqué], de tener contautu con [daquién]. Cambió de coche porque lu tenía tou vieyu. Cambió de mozu. Esti añu cambiaron l’horariu. 7 Poner o ponese en [otru sitiu]. Cambiáronlu de clas. 8 Confundir [una cosa con otra]. ¡Ai fíu, tu tolo cambies! || Cambiar de camisa, fam. dexar de tener una manera de pensar, una ideoloxía pa tener otra [por comenencia]. || Cambiar de chaqueta, fam. dexar de tener una manera de pensar, una ideoloxía pa tener otra [por comenencia]. || Cambiar la chaqueta, fam. dexar de tener una manera de pensar, una ideoloxía pa tener otra [por comenencia]. || Cambiar el rabu poles oreyes, fam. sustituyir daqué por dalgo que ye peor.