camín, el: sust. Espaciu [preparáu pa dir d’un sitiu a otru]. 2 Terrenu [pisao, estrecho y allargao pel que se pue andar, rodar]. 3 Espaciu [que se percuerre d’un llugar a otru, qu’hai d’un sitiu a otru]. Queda munchu camín. D’equí a Casomera hai munchu camín. 4 Espaciu [qu’ocupen los filos qu’hai ente les llazaes o nuedos del texíu]. 5 Llinia [imaxinaria que percuerre un oxetu que se mueve d’un puntu a otru]. Esi asteroide cambia’l camín cada dos años. 6 Posibilidá, oportunidá [de facer daqué]. Nun veo camín pa salir d’esti problema. 7 Métodu, mediu [que val pa llograr daqué]. La cultura ye bon camín pal progresu. || A camín, arreglao, solucionao. Si nun te gusta, nun lo comes y a camín. || A caminos, a trabayar d’estaferia. || A mediu camín, na metá [d’un procesu]. || Agarrar de camín, coincidir [un fechu, una aición] nun puntu del camín que s’anda. 2 Tar asitiáu nel camín. || Cagar la perra en camín [a ún], salir mal [a ún] dalgo qu’esperaba que saliera bien. || Camín de, contra, en direición a. Va camín de Francia. 2 Alredor de, nun momentu cercanu a. Llegaron camín de les once. || Camín de cabres, vía de comunicación permala d’andar. || Camín de sagramentos, percorríu [que facía’l cura pa llevar la estremaunción, la comunión a los enfermos]. || Camín de Santiago, regueru de lluz [que traviesa’l cielu pela nueche], formáu poles estrelles de la nuestra galaxa. || Camín francés, ruta [de los pelegrinos a Santiago de Compostela]. || Camín real, vía de comunicación principal [d’époques pasaes]. || Camín vecinal, vía de comunicación [pública que depende d’un pueblu, d’un conceyu]. || De camín, faciendo viaxe. Llevaben siete hores de camín. 2 De la que se fai’l viaxe. Tuvi en Soria de camín. 3 Contra, en direición a. || De camín que, a la vez que, de la que. De camín que vas a la fonte, avisa a Concha. || Dexase de los caminos, asitiase, asentase. || En camín, viaxando. 2 Orientáu, bien encamináu [un asuntu, una persona]. 3 Entamando a nacer [un neñu]. || Entrar pel camín vieyu, fam. empapizar. || Facer camín, entamar daqué [solucionando les primeres torgues pa qu’otros sigan faciéndolo con más facilidá]. || Llevar camín de, tar actuando de manera que dexa albidrar [lo que va asoceder]. Lleva camín de ser médica. 2 Tar d’una manera que dexa albidrar [lo que va asoceder]. Lleva camín de siguir lloviendo. 3 Ser a controlar a [daquién]. El maestru nun lleva camín d’esti neñu. || Llevar el camín de [daquién], facer lo mesmo que [daquién]. || Nin camín nin carrera, nada [conocer, saber]. || Per bon camín, faciendo les coses afayadices [pa llograr un fin]. || Per mal camín, faciendo les coses afayadices [pa nun llograr un fin].