calabaza, la: sust. Planta del xéneru Cucurbita, Colocynthis, Lagenaria y Cucumis [de fueyes grandes, de flores marielles y frutu grande y comestible]. 2 Frutu [grande y comestible de les plantes de los xéneros Cucurbita, Colocynthis, Lagenaria y Cucumis]. 3 Parte [central de la rueda del carru onde encaxen los rayos]. 4 Parte [del caidón qu’encaxa na reya delantera del ramu, de la carreña]. 5 Recipiente [fechu col frutu secu y güecu de les plantes de los xéneros Cucurbita, Colocynthis, Lagenaria y Cucumis]. 6 Recipiente [fechu col frutu secu y güecu de les plantes de los xéneros Cucurbita, Colocynthis, Lagenaria y Cucumis enllenu de daqué]. 7 Cantidá [de daqué que lleva un recipiente fechu col frutu secu y güecu de les plantes de los xéneros Cucurbita, Colocynthis, Lagenaria y Cucumis]. 8 Papada. 9 Perendengue, oxetu [que se pon d’adornu nes oreyes]. 10 fam. Cabeza, parte del cuerpu. 11 fam. Respuesta negativa [que se-y da a daquién que fai un pidimientu amorosu]. || Calabaza montés, Cucurbita pepo, planta [de fueyes grandes que medra arrastrándose pela tierra]. 2 Frutu de la Cucurbita pepo. || De maza en calabaza, fam. andando desorientáu [d’un llau pa otru]. || Facer beber per calabaza rota [a ún], fam. volver llocu. 2 Dar munchos disgustos, facer sufrir.