agarrar: v. Suxetar [cola mano, con un utensiliu]. Agárrala que cai. Agárrate fuerte a min. 2 Quedar suxetu [un deu, un pie con daqué de manera que lu manque]. Ten cuidáu que vas agarrar la mano cola puerta. 3 Algamar, llegar a tener [daqué pa daquién espurriendo’l brazu o cola ayuda d’otru oxetu]. Agárrame’l llibru, que ta mui altu. 4 Axuntar [daqué que taba espardío cola ayuda d’un oxetu]. Agarra cola escoba toes eses migayes que tiresti. 5 Apoderase de [daqué ensin permisu]. 6 Quedase con [daqué que-y regalen, que-y ufierten]. 7 Detener [a una persona, a un animal pa zarralu, pa metelu presu]. 8 Consiguir, facese con [daqué]. Agarró un bon trabayu. 9 Atayar, llegar al mesmu puntu que [otru]. Agarrélu nes escaleres. 10 Sorprender [a ún faciendo dalgo inconveniente, que nun quería que se supiere]. Agarróme viendo la televisión. 11 Axuntar [una cosa a otra con una sustancia afayadizo]. Esti papel agarró bien a la parede. 12 Apegar [una comida, un cacíu]. Esta pota agarra. Les fabes agarráronme güei. 13 Atrocar [un tiempu pa facer daqué]. Agarró vacaciones n’agostu. 14 Atrocar [vez pal médicu, na tienda]. De la que vas pa casa agárrame la vez. 15 Ocupar, enllenar [un espaciu]. Agarres tu media cama, nun me dexes sitiu. 16 Entamar a tener [fuercia, color, una enfermedá]. 17 Entamar [con un estáu d’ánimu determináu una actividá, un llabor]. Agarró la cocina con muncha gana, pero cansó llueu. 18 Entamar a facer [daqué]. Agarró’l cursu a la metá. 19 Coincidir [un fechu, una aición nun puntu del camín que s’anda]. La engarradiella agarróme de la que diba pa casa. 20 Montar en [un tren], en [un autobús]. 21 Parar pa xubir [a daquién un coche, un autobús]. El tren agarra a los viaxeros equí. 22 Quedar con [daqué, d’ente dellos oxetos, d’ente delles posibilidaes por convencer más, por gustar más]. Agarra’l que quieres, que te lu compro yo. 23 Atropellar [un coche, un camión]. Agarrólu na curva. 24 Alcontrar [d’una manera, nun estáu d’ánimu determináu]. Agarrómos l’agua de la que xubíemos. Nun agarrasti a to ma de mui bon humor. 25 Tener [un sentimientu, una enfermedá]. Agarró ascu al bonitu. Agarren unes gripes mui grandes. 26 Afeutar, producir efeutu [una enfermedá, una calamidá, el sol]. Güei agarróte bien el sol. 27 Entender [una idea, un conceutu]. 28 Facer propies [maneres, costumes ayenes]. 29 Quedar preñada [una fema]. 30 Prender [una planta, un inxertu]. 31 Usar [una máquina, un oxetu]. Nun agarra nada la máquina de coser. Tú, los llibros, agárreslos poco. 32 Dir [per un camín, per una direición]. 33 Contratar [a daquién pa un trabayu]. 34 Recibir [la llonxitú d’onda d’una emisión d’un programa, d’una cadena]. Nun s’agarren les cadenes privaes. 35 prnl. Amarrase, engarriase. 36 prnl. Trabayar [poniendo munchu interés]. 37 prnl. Tirar [con fuercia pa llevantar un pesu]. || Agarrala, llegar a tener una borrachera. || Agarrar cuerpu, dir agarrando forma una realidá. Eso del subsidiu nun agarra cuerpu. || Agarrar de camín, coincidir [un fechu, una aición nun puntu del camín que s’anda]. 2 Tar asitiáu en [el camín]. || Agarrar el gustu [a daqué a daquién], avezase [a facer daqué que presta, a tar con daquién que gusta]. || Agarrar el montante, fam. colar, marchar [d’un sitiu]. || Agarrar el pendín, fam. marchar, colar [d’un sitiu]. || Agarrar el rapón, descuidase, nun tener cuidáu. || Agarrar fríu, tar nun ambiente que tien una temperatura baxo y ponese malu. || Agarrar la delantera, adelantase [a otra persona]. 2 Aprovechase de les debilidaes de [una persona de más autoridá pa nun facer casu de los mandaos]. || Agarrar la muerte, fam. ponese mui malu. || Agarrar la puerta, fam. marchar, colar d’un sitiu. || Agarrar pela pallabra a [daquién], tener en cuenta lo que diz o promete [daquién pa facer daqué]. || Agarrar pelos coyones [a daquién], fam. tener [a daquién] controláu de manera tala que si fai daqué inconveniente pierde determinaos beneficios o ventayes. || Agarrar vela, quedar ensin sueñu, nun poder dormir. || Agarrar y, *espresión cola que se refuerza lo que se diz darréu. || Agarrase a un clavu ardiendo, aprovechar cualquier circunstancia favoratible. || Nun haber per ónde agarrar daqué o a daquién, *espresión cola que se da a entender que daqué o daquién nun tien nada bono. || Nun tener per ónde agarrar daqué o a daquién, *espresión cola que se da a entender que daqué o daquién nun tien nada bono.