bravu, -a, -o: ax. Valiente, que s’enfrenta colos problemes, colos peligros ensin evitalos [una persona]. 2 Decidíu, que toma un determín ensin duldar. 3 Farrucu, que s’envalentona fácil. 4 Enfadáu, que ta de mal humor. 5 Violentu, dau a atacar [un animal]. 6 Fuerte, que tien o vien con fuercia. El ríu baxa bravu. 7 De bona calidá [la madera, el ganáu]. 8 Montés [un frutu, una planta]. 9 Qu’enxamás se llabró [un terrenu]. 10 Ensin adomar [un animal]. 11 Grande, que tien un tamañu, una midida, una edá, una intensidá penriba de lo necesario, de lo normal, de lo que se pon como referencia. Tien bravu prau. Tien bravos pelos. 12 Grande y curiosa [una persona]. 13 Fuerte y malo [el tastu de la carne de los animales acabante cazar]. || A la brava, pola fuercia. || Arbeyu bravu, planta lleguminosa del xéneru Vicia [que crez enredándose n’otres y que da caxines anegrataes con granos comestibles]. || Ayu bravu, Allium sphaerocephalum, planta [de fueya cilíndrico y flores encarnaes]. || Felechariella brava, Polypodium vulgare, felechu [que se cría peles muries, pelos teyaos]. || Fresa brava, Potentilla fragariastrum, planta [con flores asemeyaes a les de la variedá de güerta de la Fragaria vesca]. || Gochu bravu, xabalín. || Mal bravu, enfermedá contaxosa [del ganáu que se carauteriza polos berríos y blincos que da]. || Nabu bravu, Sinapis arvensis, nabiza, planta [de fueya ovalao y peludo que da un frutu pequeñu y allargáu]. || Palombu bravu, Columba palumbus, páxaru [de color gris, col pechu acolorazáu y una mancha blanca en pescuezu]. || Pataques braves, pataques [arreglaes con salsa picante].