vieyu, -a, -o: ax. Que tien munchu tiempu. 2 Gastáu, que tien aspeutu de tener munchu tiempu. 3 Que tien les zunes, les idees d’una persona con munchos años. || Añu vieyu, últimos díes del añu. || Arcu la vieya, semicírculu de colores [que se forma en cielu cuando la lluz del Sol trescala l’agua que cai de les nubes]. || Avezase la vieya a tostones, fam. avezase a la bona vida. || Bocáu de la vieya, tira de grasa [que se saca de la barriga del gochu]. 2 Fueya [tienro de la faya]. || Cocu la vieya, merucu, guxán [que se cría ente la tierra llento]. || Comedura (de) la vieya, espaciu güecu [qu’hai ente la cáscara d’un güevu y la telina qu’envuelve la parte comestible]. || De vieyo, dende cuantayá, dende munchu tiempu. Conocémonos de vieyo. 2 Tradicional, de la tradición d’un pueblu. Cuentos de vieyo. || Entrar pel camín vieyu, fam. empapizar. || La cuenta la vieya, conxuntu d’operaciones aritmétiques mui cencielles o que se faen colos deos. 2 Ilusiones [que se fai daquién ensin fundamentu]. || Nueche vieya, nuechevieya. || Pesar como un matrimoniu vieyu, fam. pesar muncho. || Ser de la vieya p’arriba, ser revolvín. || Sol de les vieyes, lluz apagao del sol qu’hai al atapecer. || Tayada (de) la vieya, pedazu [pequeñu de daqué].