ser: v. *Verbu copulativu qu’indica que daqué o daquién esiste, que tien unes cualidaes, un resultáu determináu. || Asina ye que, de manera que, como consecuencia de lo anterior. Llueve, asina ye que quedamos en casa. || Como fuera, de cualquier manera. || Como seya, de cualquier manera. || Desque’l mundu ye mundu, dende siempre. || El que fuera, cualquiera, cualquier persona. || El que seya, cualquiera, cualquier persona. || Ello foi una vegada, *espresión que sirve pa entamar una narración y qu’equival a n’otru tiempu. || (Ello) yera una vez, *espresión que sirve pa entamar una narración y qu’equival a n’otru tiempu. || Esto ye, *espresión que s’emplega pa esplicar o especificar lo que se vien de mentar. || Falar daquién y rinchar un carru ye too uno, *espresión que s’emplega p’amosar que cuando fala daquién nun lu escuchen, que nun-y faen casu. || Foi casu que, *espresión que s’usa pa entamar un cuentu, una narración. || Lo que fuera, cualquier cosa. || Lo que seya, cualquier cosa. || Nun ser carne nin pescáu, nun ser d’una manera nin d’otra. || Nun ser cosa de que, nun ser que. Dame esi llapiceru nun seya cosa de que lu pierdas. || Nun ser cosa del otru xueves, nun valir muncho [daqué], nun ser estraordinariu. || Nun ser naide, nun ser una persona [con poder de decisión, con autoridá]. || Nun ser tres dioses, ser malu y poco honráu. || Nun vaya (a) ser que, por si, por si acaso. Quita la ropa nun vaya ser que llueva. || O seya, *espresión que s’emplega pa esplicar o especificar lo que se vien de mentar. || O sía, *espresión que s’emplega pa esplicar o especificar lo que se vien de mentar. || Onde fuera, ondequiera, en cualquier sitiu. || Onde seya, ondequiera, en cualquier sitiu. || Ser a, tener capacidá pa [facer daqué]. || Ser a les once, fam. nun tener [daquién] la capacidá, les condiciones necesaries pa razonar, pa facer les coses con xuiciu. 2 Tar llocu. || Ser a les once y media, fam. nun tener [daquién] la capacidá, les condiciones necesaries pa razonar, pa facer les coses con xuiciu. || Ser acordáu, acordase. Nun soi acordáu de que tuviera él. || Ser al casu, ser amañosu, conveniente. || Ser aparte, ser especial. || Ser azucre en puntu, nun tener espera, ser impaciente. || Ser chapáu en, ser mui asemeyáu a. Esti neñu ye chapáu en so padre. || Ser como mañana nos veremos, fam. tener pocu xuiciu [una persona]. || Ser cosa de, llevar un tiempu de. La obra ye cosa de seis meses. 2 Precisar, necesitar. Ye cosa de seis o siete millones. 3 Ser necesario [facer daqué]. Va ser cosa de llevalu pa Les Arriondes. 4 Ser responsabilidá de. Facer güei la comida ye cosa d’Andrés. || Ser cuestión de, llevar un tiempu de. Esto ye cuestión de dos hores. 2 Precisar, necesitar. Pintar esi cuartu ye cuestión de quince mil pesetes. 3 Ser necesario pa [facer daqué]. Ye cuestión de poner tolos datos bien pa ver si te dan la subvención. || Ser de la vieya p’arriba, ser revolvín. || Ser demoniu encarnáu, ser cosa sabida. || Ser fechu a, ser capaz de. Si-y das confianza, ye fechu a burllase de ti. || Ser fíu de padre, asemeyase al padre na manera de facer les coses. || Ser fumu [daqué], ser de poca importancia y pasaxeru. || Ser la hostia, fam. ser estraordinariu, fuera de lo común. || Ser la última pallabra (de) el creu, fam. ser l’últimu n’orde d’importancia. 2 Ser mala persona. || Ser la Virxe, fam. ser estraordinariu, fuera de lo común. || Ser mediu home, ser un home ensin valor. || Ser pa, tener capacidá [pa facer daqué]. || Ser panín, fam. ser fácil, cenciellu. 2 Ser víctima [de daqué o daquién]. || Ser quien, tener capacidá pa [facer daqué], pa poder [facer daqué]. || Ser quien a, tener capacidá pa [facer daqué], pa poder [facer daqué]. || Ser quien pa, tener capacidá [pa facer daqué], pa poder [facer daqué]. || Ser tol monte oriéganu, fam. poder facese too. || Ser un bisberil, tener bayura [una casa, un sitiu]. || Ser un cagar de ventana, fam. ser mui fastidiosu, mui complicáu [un asuntu, una persona]. || Ser un casu, ser fuera de lo corriente. || Ser xente, ser bona persona. || Ser yerba d’otra tenada, fam. ser [un asuntu] diferente del que se ta tratando. || Ye dicir, *espresión qu’introduz una esplicación.