peón, el: sust. aum. de pie. 2 Pegollu [d’un horru, d’una panera]. 3 Palu [inclináu de los cuatro qu’hai nel horru, que sofita l’aguilón del teyáu apoyándose na trabe]. 4 Piedra [nel cabu inferior del fusu del molín que xira sobre la escala na qu’encaxa]. 5 Piedra [con un furacu en mediu onde xira otra piedra que ta colocada nel cabu inferior del fusu del molín]. 6 Pieza [puesta en vertical de la boca del fornu]. 7 Rastru, deformación, alteración o cosa [que queda en daqué o daquién por efeutu d’una aición, del pasu per un sitiu]. El perru yá agarró’l peón. 8 Peonza, xuguete [de forma cónica con una punta de fierro, al que se-y endolca una cuerda pa tiralu en suelu y se tenga de pie voltiando]. 9 Pieza [d’axedrez que se mueve nun cuadru y ye la que tien menos valor]. || A (el) pie peón, xuegu de neños [que consiste en saltar apoyando namái un pie en suelu]. || A peón, caminando. || Faba de peón, planta de güerta del xéneru Phaseolus [que da frutos redondos y blancos]. 2 Frutu [redondu y blancu que da una planta del xéneru Phaseolus].