llargu, -a, -o: ax. Que mide [más] o muncho na direición d’atrás alantre. Un tren llargu. 2 Que mide [más] o muncho na direición d’arriba abaxo. Una torre llarga. 3 Que dura [más] o muncho. Un conciertu llargu. 4 Que llega pelos todiyos [una falda, un pantalón], per debaxo del coldu [una manga]. 5 Que pasa del puntu que se quier dar [una bala, un dardu]. 6 Cumplida y sobrepasada [una edá, la hora]. Tien un añu llargu. Son les seis llargues. 7 Xenerosu, arrogante [pa colos demás]. 8 Abondosu, en cantidá grande. 9 Llistu y picardiosu, con muncha capacidá [pa responder, pa entender]. || A la llarga, n’horizontal y en tola so dimensión. 2 Al final d’un tiempu llargu. || A lo llargo, n’horizontal y en tola so dimensión. 2 Per, a traviés [d’un periodu de tiempu, d’un llugar]. || Bonitu llargu, Thunnus alalunga, pexe [grande de color azul escuro y platiao con ales pectorales mui llargues]. || Cara llarga, aspeutu de la cara [qu’amuesa esmolición, enfadu]. || Cazu de rabu llargu, cacíu [más anchu qu’altu y con un mangu llargu que s’emplega pa tostar pataques, güevos]. || Chupu llargu, carambelu allargáu. || Como mayu de llargu, fam. de bona estatura [una persona]. || Como un mayu llargu, fam. de bona estatura [una persona]. 2 Pesada, cafiante [una persona]. || Dar llargues a [daqué], aplazar [daqué pa desentendese d’ello]. || De la mano llarga, fam. dau a robar. 2 Dau a pegar. || De la uña llarga, fam. dau a robar. || De llargo, xunto a un sitiu o a daquién, ensin dase cuenta, ensin saludar, ensin parar [pasar, tirar]. || De rabu llargu, de sabor amargo [un tipu de pera]. || De tiros llargos, fam. bien vistíu. 2 Vistíu con ropa elegante, de ceremonia. || Dientes llargos [por daqué], fam. muncha gana de [daqué]. Namái velo yá se-y ponen los dientes llargos. Vieno d’ellí colos dientes llargos polos llibros que tien. || Guión llargu, signu ortográficu que se representa por «-» [que s’emplega pa entamar el falamientu d’un personaxe, pa inxerir un comentariu ente dos d’ellos]. || Llargu de mano, mui trabayador. 2 Que desenvuelve trabayu. || Llargu metraxe, película [cinematográfica llarga que dura más d’una hora]. || Llingua llarga, vezu de falar de lo que se tenía que callar. 2 Persona que tien el vezu de falar de lo que se tenía que callar. || Mano llarga, fam. enclín a robar, a pegar. || Más anchu que llargu, poco sinceru. 2 Tranquilu, ensin esmolese por nada. || Pasar de llargo, ver un asuntu [ensin parase a tratalu]. || Poner los dientes llargos a [daquién] con [daqué], fam. facer que [daquién] tenga muncha gana de [daqué]. || Ponese los dientes llargos con [daqué], fam. entrar a [daquién] muncha gana de [daqué]. || Rabu llargu, Aegithalos caudatus, páxaru [pequeñu de rabu perllargu y de color blanco y negro]. || Uña llarga, fam. enclín a robar. || Vista llarga, fam. hipermetropía.