coxu, -a, -o: ax. Que-y falta un pie, una pierna, una pata. 2 Qu’anda mal o con dificultá [por tener un dolor na pierna, por tar ensin un pie, por una mancadura na pata]. 3 Con males condiciones p’andar, pa sostenese [una pata, una pierna, un pie]. 4 Que pilanquia, que se mueve [por nun tener los puntos d’apoyu afitaos nuna superficie, en suelu]. 5 Que nun ye completa [una fras, una esplicación, un ritmu]. 6 Col botón o los botones abrochaos nun furacu de l’abotonadura que nun-yos correspuende. || A la pata coxa, xuegu [que consiste en saltar apoyando namái un pie en suelu]. 2 Apoyando namái un pie en suelu y l’otru llevantáu. || Más malu que’l pecáu coxu, fam. que nun tien virtúes morales, que busca perxudicar [una persona]. || Pita coxa, xuegu [que consiste en saltar apoyando namái un pie en suelu].