casar: v. Axuntar [llegalmente, de manera civil o relixosa dos persones]. Casólos el sábadu l’alcalde de Noreña. 2 Axuntase [llegalmente, de manera civil o relixosa una persona con otra]. t. prnl. Xuan casóse con Ana hai tres años. Fernando casó con María l’añu pasáu y hasta agora. 3 Encaxar [dos o más coses complementaries]. Esta pata ye d’esta mesa, ¿nun ves que casen? 4 Tar o ponese en rellación harmónica [les persones, les coses, les partes d’un conxuntu]. Son mui amigos, casen bien en too. Esta falda nun me casa con esta chaqueta. 5 Axuntar [cartes acordies col palu, col númberu en dellos xuegos de baraxa]. Si caso reis y sietes ¿gano? 6 Tensar [la escota, la vela pa que la embarcación vaya escontra l’aire]. || Casar les lletres, solletriar, dicir colos sos nomes les lletres [d’una pallabra]. 2 Lleer cuando nun se sabe mui bien marcando les sílabes. || Casase (pa) en casa, axuntase [llegalmente, de manera civil o relixosa con una persona y quedar a vivir na casa paterna]. || Casase [nun sitiu], axuntase llegalmente, de manera civil o relixosa con una persona de [un sitiu]. 2 Axuntase llegalmente, de manera civil o relixosa con una persona y quedar a vivir [nun sitiu].