cara, la: sust. Parte delantera de la cabeza [d’una persona]. 2 Parte delantera de la cabeza [per debaxo de la frente]. 3 Parte delantera de la cabeza [de dellos animales]. 4 Aspeutu de los trazos de los órganos que tán na parte delantera de la cabeza y [qu’espresa un estáu d’ánimu, un estáu físicu]. ¿A ónde vas con esa cara mieu? 5 Apariencia, aspeutu esterior [de daqué]. Esa comida tien mala cara, pero bon tastu. 6 Llau [d’un oxetu, d’un astru]. 7 Llau [d’una páxina, d’un oxetu planu]. 8 Llau [d’una moneda, d’una medaya onde apaez la figura principal]. 9 Parte [delantera d’un edificiu, d’un oxetu]. 10 Planu [de los que formen un poliedru]. 11 Descaru, falta de vergüenza. || A cara o cruz, al azar d’una moneda que se tira n’alto [pa ver de qué llau cai] || A cara perru, fam. con descaru, ensin vergüenza. 2 Con dureza, ensin compasión. 3 Faciendo un esfuerciu [pa llograr daqué, p’algamar una solución que ye mui abegosa]. Operáronlu a cara perru. 4 De frente, derechamente. || A cara y cruz, al azar d’una moneda que se tira n’alto [pa ver de qué llau cai]. || A la cara, direutamente y tando delantre [ensin mediación nenguna]. || Cara (a), contra, en direición a. 2 En frente, mirando pa. Venía andando cara a mi. || Cara a cara, direutamente y tando delantre [ensin mediación nenguna]. 2 De frente, derechamente. || Cara de lluna enllena, cara grande y redonda. || Cara de media lluna, cara grande y redonda. || Cara llarga, aspeutu de la cara [qu’amuesa esmolición, enfadu]. || Cayer la cara de vergüenza [a daquién], entrar una vergüenza pergrande [a daquién]. || Cola cara torcida, enfadáu, enfocicáu. 2 De mala gana, mal a gustu. || Cuspir a la cara, dicir [daqué] abiertamente, ensin miramientu. 2 Despreciar muncho. || Cuspir na cara, fam. dicir [daqué] abiertamente, ensin miramientu. 2 Despreciar muncho. || Dar cara a [una cosa], poner curiosa, con bon aspeutu [una cosa]. || Dar cara [a una persona], poner curiosa, con bon aspeutu [a una persona]. 2 Falar con [daquién al cruciase con él, al atopalu nun sitiu]. || Dar cola puerta na cara, fam. refugar de males maneres [a una persona]. || Dar el sol na cara, facer avergonzase [a daquién]. || Dar la cara, responder [por daqué que se fixo o dixo]. || De cara, pela parte delantera, per delantre. 2 De frente, derechamente. || (De) cara a, pela parte delantera, per delantre. 2 En frente, mirando a. Sentóse de cara a la parede. || Echar en cara, recordar [con mala intención a daquién daqué que fixo o dixo]. || En cara, en direición a, contra. Vamos en cara la oficina. || Facer cara [a ún], convidar [a daquién]. 2 Enfrentase [a daquién]. || Llantar na cara, dicir [de malos moos daqué que se tenía que callar]. || Llavar la cara, facer o dicir daqué colo que s’atapa otra cosa de más importancia que nun se fixo. || Na cara, direutamente y tando delantre [ensin mediación nenguna]. || Partir la cara, fam. pegar, dar golpes na cara. || Plantar cara [a daquién o a daqué], enfrentase [a daquién o a daqué]. || Poner bona cara a [daqué] o [a daquién], amosar bones intenciones pa [daqué] o con [daquién]. || Poner mala cara a [daqué] o a [daquién], nun amosar bones intenciones pa [daqué] o con [daquién]. || Quitar la cara [a daquién], fam. pegar un golpe fuerte na cara [a daquién]. || Revirar la cara [a daquién], fam. pegar un golpe na cara [a daquién]. || Romper la cara [a daquién], fam. pegar un golpe na cara [a daquién]. || Tener dos cares, ser falsu, hipócrita. || Tener la cara como (el) cementu (armao), fam. ser cínicu, nun tener vergüenza. || Tener la cara como un lladriyu, fam. ser cínicu, nun tener vergüenza. || Tener la cara como un panchón, fam. ser cínicu, nun tener vergüenza. || Tener la cara (mui) dura, fam. ser cínicu, nun tener vergüenza. Hai que tener la cara mui dura pa dicir eso. || Travesar la cara [a daquién], fam. pegar un golpe na cara [a daquién]. || Vese les cares, atopase [dos o más persones pa falar d’un asuntu nel que nun tán d’acuerdu pa echase la culpa]. || Volver la cara, fam. pegar, dar golpes na cara.